Icanimoxenの資源回收：日本／台語文

塗炭仔。
1915.9，no.366，pp.11-12

某國有兄弟兩人做朝內的文官。兄哥有生一个查某囝名叫寶善。到14歲，父母攏過往，就予in叔chhoā去照顧。小弟也有生兩個查某囝；一个名叫寶珠，一个名叫寶玉。寶珠這時12歲，寶玉13歲。In老父這時身體致病，就辭官回家養病。

In嬸真疼伊兩个查某囝，每日干焦顧梳妝。寶善每日料理煮食洗衣裳，也著揀塗炭，致到身軀常常有塗炭的 lâ-sâm，紲共伊叫做塗炭仔。總是遐爾著磨亦毋捌受氣，算是真好女德。對來in叔兜7年久，伊兩个小妹妝thāⁿ媠媠閒閒，伊攏毋捌傾分，家己逐日認職理家。

這時拄著太子欲娶某，召通國的在室女，著來予伊請。彼霎in兩个小妹坐車欲去赴太子的筵席。塗炭仔共in嬸稟伊也愛去；in嬸佮伊兩个小妹攏嫌伊講，「你這扮也敢thí開喙講欲去，真袂見笑leh！。」予in嬸佮兩個小妹責備，面紅紅就閣入去塗炭間，目屎ná落雨，總是毋敢哮出聲。

日本ê怪事
1886.01 第7張　P.46

差不多十年前，佇日本ê庄社有一人去歇佇hit客店，佇遐食好物，也蹛好所在，請人來吹簫唱曲，啉酒快樂一場。到beh睏ê時，吩咐店主，kah伊明仔載11點鐘著叫伊精神。彼个店主就照伊ê話，到彼時入去beh叫伊；看見眠床前soan出一支狐狸尾，忽然驚到袂顧得，隨時走出來，拍算彼个人客的確是妖怪。家己teh想--kioh毋過有吩咐伊，若無叫伊，又驚了予伊koè-siàu譴責。

姑不將閣再入去，就看彼个人客坐佇眠床，teh食薰。彼个人客看見店主心神搭嚇，就問伊，你有入來遮看見啥貨？事先店主毋敢講：kan-ta推辭講：無--ah，無--ah！彼个人客閣講：你的確有看見甚乜--leh；你著明明kā我講。彼个店主然後chiah kā伊講老實，我有看見一支狐狸尾。彼个人客chiah應伊講，Hm̄-hm̄，你taⁿ已經有看見，我不妨實在kā你講。我就是老狐狸，常時踮佇山裡； chit-tia̍p來遮是beh辦代誌。你所看所聽chit號事，你斷斷毋通kā人講。你若果然按呢，sio̍k-hō͘你不論有錢hē佇廟--ni̍h，我beh予你加一倍。講了就做伊起身，攏無半圓所費予伊； 彼个店主也毋敢kā伊提。 聽候到明仔載就真正提50錢hē佇廟--ni̍h試看；到後--日來看，果然有變一百。Hē到幾若日，猶原是按呢，在彼个店主不止深信lah。心肝ná 貪，到路尾就拾到100遐；閣去hē遐。到明仔載去看，毋若無加，hām伊家治ê也紲無去。猶久毋死心，就閣去hē一擺，隔日去看，猶原是無去；彼个人誠實毋是狐狸，不過是知in有對重彼个khiàn-sńg，所以揣這个縫來賺食伊。

蜜蜂ê類1892.06 86卷 p.46-47

蜜蜂分做三等；一等是公--ê，一等是母--ê，koh一等是受差--ê。母--ê身軀腹肚較長，腰也小細，翼較尖，尾ê刺彎彎bē叮--人，嘴kap跤攏是火夫色；蜜婆ê頂面有一隻母--ê號做蜂王，chiah-ê蜂攏是這隻生--ê。公--ê身軀肥、腰厚、目珠大，tiàm tī較頂面，beh相連；鬚分做十三節，腹肚圓圓，尾刺直koh長，也gâu叮--人。受差用ê蜂，比公--ê母--ê較細隻，伊ê色緻是紫色烏色，腹肚底有橫痕。母蜂無做別物代誌，到春天來，獨獨掌理所放ê卵。所放--ê就是做受差ê蜂，koh放--ê就是做工ê蜂；第3擺放--ê猶原做受差用ê蜂。

1 siū蜂ê中間，公--ê ê數額濟--ê二千隻，少--ê也有六百隻。受差--ê ê數額濟--ê有二萬隻，少ê也有一萬五千隻。另外有一種ê卵，專專是出母--ê做蜂王，一年不過是三五隻nā-tiāⁿ，所出ê王kap別ê蜂有各樣。受差--ê著替伊去chhoē食。到二十外日攏平平大，tī蜂siū ê內面hán-siaⁿ出--來，無偌久就將新ê蜂領出--來，內面有幾若個王分做幾若隊。

受差用ê蜂伊ê嘴不止奇怪，有人用顯微鏡kā伊看，前半koe̍h分5個長齒，中間一齒較大，雙爿邊有濟濟細仔齒，其中大齒會長會短，不止利便thang採花心ê粉。近中央tī大齒ê所在，koh有兩支嘴齒，伊ê齒尾有刺，就是幫贊中央ê大齒，後半koe̍h攏有sok仔來sok hit個5個長嘴齒。後腿ê前koe̍h中央空空親像細ê袋仔，雙爿有刺親像門，嘴食花粉直直吞到後腿蜜孔ê所在，來裝到滿滿，用雙爿ê門刺照顧。

這號ê蜂也愛食花心汁，吞到腹肚內化做蜜，蜜滿就倒轉來伊siū內ê空房，照數額來吐出，hit個貯蜜ê房也足奇怪，驚了蜜流出--來，以及有空氣入去來扑歹hit個蜜，所以代先做蠟來糊，hō͘蜜攏bē流一點仔出--來，而且無透風。Koh另外用一半ê蜜，一半ê花粉來hô，親像bīn-thâu ê款式，下入siū內hō͘起頭出世ê蜂通食。又koh hit個房m̄是四角m̄是圓，六面有尖角，因為四角有蜂入 hit 內面，四角頭攏有hit個空所在。圓--ê就是房kap房相連，外面猶原有空所在。獨獨6面就有逐個房來相接，做房真濟，也堅固，koh hit個房逐choā有一列橫--teh，設使有一choā ka-la̍uh，中央就欠一choā，蜂ê往來較不便，又oh-tit將這choā ê歹房重起tī原位，因為án-ni，才做橫橋tī hit 頂面，hō͘伊往來利便。Koh接續hit個房，不致墜落--來，這kiám m̄是上帝ê意思hō͘伊有智識mah？

和約ê條款1895.05 122卷 p.46

中日所立ê和約hiah ê條款已經有印tī阮ê新聞報；今m̄ 免攏總翻譯，kan-ta摘出逐條ê大略來印tī下底：

1. 高麗國thang自主，m̄ 免koh進貢中國。 
2. 中國遼東beh 割一塊hō͘日本。[後來這款是免。] 
   台灣著hō͘伊。 
   澎湖著hō͘伊。
3. 兩爿著派人去分別界址。
4. 中國著賠銀兩萬萬兩。[因為遼東無hō͘伊，加貼一萬萬兩。]著做8 pang 繳清楚，頭pang 限 6月日著繳 5000萬，二pang koh 6月日koh繳 5000萬。其餘分做 6 pang 交，一年koh繳一koè。停到6月了後所未交ê銀攏著算利息hō͘ in,每年一百箍beh 生 5箍利。3年內，若會tit交清楚in 就m̄ 收利，連代先提ê利錢也beh 提出來還。
5. 台灣kap澎湖ê百姓若beh 離開搬過別位企，in thang賣in ê田園厝宅做in 去，限兩年內hō͘人發落，到兩年滿iáu toà teh--ê是出在日本人beh 掠做in ê百姓抑無。和約khàm 印明白兩國beh 差官員來台灣交盤，限兩月日內著交in ê手。 
6. 這款攏是講起做生理ê事，m̄ 免翻譯。從中有加設 4位thang做通商ê租界，就是湖北ê沙市，四川ê重慶，江蘇ê蘇州，浙江ê杭州。
7. 限 3月日日本著退兵離開中國。
8. 獨獨威海衛thang hō͘日本兵toà hia守候，看有照約無。到頭二pang ê銀繳過了，威海衛也著還中國。其餘未還ê銀中國著甘願將海關ê款做準當。設使bē tit好勢，日本兵著tiàm 威海衛，等到攏交清楚，才倒--去。 
9. 兩爿所掠ê兵大家著獻還；中國也bē 使tit辦in ê罪。另外hiah ê所掠著人講是細作抑是為日本ê人攏著解放無辦罪。
10. 約立好後來無koh再戰。
11. 中國kap日本ê皇帝著允准和約，到光緒 21年 4月 14，就是明治 28年 5月初 8，兩爿ê大官著提來煙臺對換。

北京城ê消息
1898.11 164 卷 p.83

近來阮有接著北京要緊ê消息，總是猶未通知伊ê詳細。 大概是差不多親像下底；總是這號代誌著真細膩講。

前張教會報已經有講起中國beh改換幾nā項ê新法，大家聽了真歡喜，因為前毋捌聽見親像這號ê款。從中有一人不止出力鼓舞這個代誌。伊是廣東省進學ê人姓康名有為。伊卻毋捌去外國，也毋捌外國話，總是有讀人所翻譯ê冊濟濟，也真愛趁西國ê款式來興起本國。伊有去北京chhoē hiah-ê大官，將伊所舉義ê新法排列予in聽。 In有ê紲報皇帝知，皇帝chiàⁿ召伊去見朝，將hiah-ê話講予皇帝聽。聽了真歡喜，呵咾伊ê話真著。

攻破大船

較倚(oá)北極hia有落雪若準佇較南爿有落雨ê款。論彼ê雪有所在是真深；頂面ê雪有the下底ê，致到tēng khok-khok，成作冰。Hit號冰有尖尖流落下(kē)ná親像做一條冰ê河。Hit號冰河有慢慢進前kàu海ni̍h。已經kàu海口冰就鑽入水ni̍h，chhun較長就大tè冰折斷(chi̍h-tn̄g)去浮佇海ni̍h。所折斷ê冰，儂叫做冰山；有時嶄然(chám-jiân)大tè，離海面幾十丈(tn̄g)懸，也佇海內幾若百丈深。論hiahê冰山hō͘水流，也hō͘風拍kàu較南爿，拄著較燒lōê所在就un5-un5-a2熔去。

Boē熔ê事(tai7)先，hiahê冰山是做海面船隻ê大危險。駛船ê暝昏時看bē著，有時船磕著冰山若準lê著石頭，soà沉落去kàu海底。

在西曆4月14暝，佇大西洋(sai-iûⁿ)倚美國hit-tah，有天下(thiⁿ-ē)萬國第一大隻船磕著hit號冰山。Hit隻是英國船號叫“Titanic”；四萬五千噸大。對基隆駛kàu神戶遐ê船是kan-ta六千外噸，án-ni hit ê “Titanic”彼in是差不多七倍較大。Hit-tia̍p大概有2200儂佇船內，船卻無連鞭沉落去，猶原浮水面差不多4點鐘久。In隨時摃無線電叫別隻船來救。另外幾若隻接(chih)著in ê 電報，就趕緊駛去in遐，可惜赴bē著；kàu位就kan-ta看幾若隻救命船，救倚800儂，其餘(kî-û)1400儂死去。大船已經沉落去。